logo

محدش عارف

كتب: نافذة مصر البلد - 2019-02-08 11:37:50

بقلم / د. مي مجاهد

لما بتنتهي أي علاقة صداقة .. حب .. ارتباط .. حتى لو شغل وكانت علاقة قريبة من قلبك ومتعلق بيها جنب الوجع بتمر عليك فترة باهته مش عارف أعيش اللي هو لا أنت قادر تنسى اللي فات ، ولا قادر تكمل اللي جاي .. بتحس إنك وحيد ، تايه زي العيال الصغيرة ، بتغرق في شبر ميه ، فجأه لاقيت نفسك في مكان مش عارفه مش بتاعك ، ضاع منك حاجة وماشي تدور عليها وتتكعبل وأنت مش شايف قدامك مع إنك متأكد إنك مش هتلاقيها بس رأسك مش بتسيب الأرض 

 

فجأه تلاقي نفسك فاضي بشكل مش طبيعي لدرجة مش عارف تعمل إيه عشان تشغل نفسك ، ولا فاكر حياتك كانت إزاي .. ملل ملوش حدود طفي جواك كل حاجة كنت حاببها خلاك بتبذل مجهود عشان تقوم من سريرك .. طب أخرج مثلا وأشوف أي حد تلاقي كل حاجة حواليك مستفزاك وبتخنقك وتغير مودك مهما كانت تافة جداً أو بسيطة أو ملهاش معنى .. يعني الجو حر بزيادة ، لا الجو برد كده ليه .. صوت العيال عالي إيه القرف ده ، تحس الناس كلها بتبص عليك كأنها عارفة حصلك إيه 

 

طب بلاش خروج خليني في البيت تلاقي نفسك اتجننت مع رنة جرس الباب ، أو فايبريشين الفون على المكتب ، وقيس على كده كتير حتى ساعات يعكننك أن سماعة الفون علقت أو اللاب هنج .. طب اعمل إيه طيب .. مش قادر أسامح واتجاوز وافوض أمري لله ، ولا قادر أفصل نفسي عن الذكريات اللي محاوطة كل حاجة حواليا لدرجه الحصار .. وتعد تسأل في نفسك وتلومها وتحلل كل حاجة مريت بيها بشكل مخيف تخنقك زيادة .

 

تخيل ده بقه كله مع كمان ضرورة أن الحياة لازم تستمر .. يعني لازم تخرج تضحك في وش الناس وأنت جواك هموم الدنيا .. وتكلم معاهم وأنت تقريبا مش سامعهم .. وتأكل وأنت مش عارف أنت بتاكل إيه ولا حاسس طعم الأكل .. وتتابع شغلك اللي مش مركز هو إيه ، بيكون الوجع مضاعف والألم ملوش حدود بس محدش عارف وخصوصا لو احترفت التمثيل .

 

آكيد كل حاجة هتنتهي وتخلص وتتنسي بس ده مش كلام سهل خالص مع إنها الحقيقية .. وجعنا ده وصعوبته والمه هينتهي بعد وقت بشع وصعب بس هيعدي ، وشوف حواليك الدنيا بندفن كل يوم حد غالي علي قلوبنا ونرجع من الدفنة على سبوع إبن فلان ، وبنشهد على طلاق أعز صحابنا ونروح نبارك فرح حد تاني والحياة بتعدي .. الفرح بتخلص فرحته والحزن بيتنسي وجعه ، بس مين اللي يقدر يعدي ومين بيقع ومش بيقدر يكمل ومحدش بيحس بيه ولا يدرى وفجاه نسمع عن فلان انتحر وفلانه جاتلها جلطة وربنا افتكرها .. ونعد نسأل ازاي ده كان كويس دي كانت زي الفل ده ضحكتهم كانت منورة وشهم .. صدقني ورا الضحكة دي وجع كبير لو زاد عن طاقتنا بتكون النهاية بس محدش عارف 

 Tweets by masrelbalad