logo

مخدرات جون طلعت والجمجمة

كتب: نافذة مصر البلد - 2018-10-17 18:30:44

بقلم

د. مي مجاهد

 

بيقولوا المصري معروف جدا بخفة دمة وأنه شعب صاحب نكته وبيقلش على إي حاجه حتى لو مشاكله ،بس بيقولوا كمان اللي يزيد عن حده بيتقلب الضد يعني الدم الخفيف له حدود والا يبقى دم ماسخ ملوش طعم ولا لون ، و الدم ده موجود منه كتير أوووي كل يومين يتحفنا بحدوته جديدة ونبدأ الهبد اليومي على السوشيال ميديا والتريقة والهزار حتى لو في الجد .

ولأن كتير مننا قاعد فاضي موراهوش غير الفيس بوك و الكومكيس والبوستات والشير فطبيعي إننا نبدأ نهيص في الهيصة وأي هيصة بقه حتى لو مش عارفين بيهيصوا على إيه وعشان إيه بس أهو من باب سد الفراغ .

وكتير هيستغرب ايه علاقة الجمجمة بالموضوع مع أن العلاقة واضحة جدا ماهي الجمجمة جواها مخ كده المخ ده مخلوق عشان يفكر مش عشان يهبد ليل نهار في الهايفة والصغيرة قبل الكبيرة .

و أكبر مثل على كلامي حالة الهبد اللي شغالة على اقتراح النائب جون طلعت بإدخال تعديل فى قانون العقوبات فى ما يخص قضايا تعاطى المخدرات، يعني يادوبك النائب اقترح التعديل و من يومها وهو مسلمش من التريقة وقبل حتى ما الناس تفهم في إيه ولا تعديل إيه حتى .

مع أن لو بصينا للتعديل هنلاقي أنه تعديل محترم لأنه بيعالج حالة المتهم المتعاطي المخدارات لأول مره في حياته بأنه بدل ما ياخد عقوبة ويدخل السجن ويطلع متعاطي وقاتل أو حرامي أو نصاب لأه هو هيحال مجبرا ( يعني غصب عنه ) لمصحات متخصصة فى علاج الإدمان يتم إعدادها كمؤسسات عقابية هيقضي فيها فترة العقوبة وكمان يخضع للعلاج النفسي والبدني للخروج من كارثة الإدمان بس بشرط إنه فى حالة رجوعه خلال مدة معينة يتم الحكم عليه بالعقوبة الأشد .

 

ولو شغلنا الجمجمة قبل ما نتريق هنلاقي أن جون طلعت لا قال نسيب الشعب يحشش ولا قال نلغي عقوبة التعاطي ولا شجع تغييب الشباب ، ولا طلع أخوان ولا عايز يلهي الشباب لحد ما يبيعوا هرم خوفو ولا بيقول ده حل نزود بيه موارد البادع ، لكن ببساطة هو اقترح تحويل العقوبة إلى نوع متطور يعالج المشكلة بشكل علمي متحضر✋

يعني كام شاب وشابة اتحكم عليه في تعاطي مخدرات واتسجن طبقا للقانون مع المجرمين وتجار المخدرات ويتحول من متعاطي ممكن تكون غلطة أو وزة شيطان لمجرم كامل الإجرام ولسه متعاطي برده .

والكلام ده مش حاجه جديدة لكن دي موجودة في عدد من الدول اللي احنا بنادي اننا نكون زيها بس للأسف محدش بيحاول يدور أو يبحث وبيكسل عن كل حاجه إلا عن التريقة و الهبد ليل نهار .

تخيل كده لو إبنك أو بنتك دماغه طاوعته أنه يجرب المخدرات واتقبض عليه وخد العقوبة وبدل ما يترحل على أبو زعبل أو تترمي في سجن القناطر ، هايروح يقضي العقوبة نفسها في مؤسسة محترمة مخصصة للاستشفاء بإشراف طبي متخصص ويتاح ليك تروحله تطمن عليه وتساعده يقضي عقوبته و كمان تساعده على العلاج والتعافي... يبقى أنهى أحسن ابني يطلع مصاحب المعلم حنتيره والمقص و أبو دومة والمعلمة باتعه وسوسو بتاعت الهرم ، ولا يخرج سليم معافى تم اصلاحه وتهذيبه بالفعل .

بعيدا عن التريقة والهبد أنا مع الإقتراح جدا وياريت يطبق فعلا بإعداد كوادر طبية متخصصة ومؤسسات عقابية تنقذ شبابنا قبل ما يضيع في عنابر السجون ونفقد جزء مهم من قوة البلد ومستقبلها .

 

أدي التعديل اللي النائب اقترحه واللي شغال الهبد عليه الله ينور من ساعه ما قاله لأن قليل اللي فهم و شغل مخه مع أن و الله سبحان الله ربنا خلقه عشان نشغله .. نفكر .. نستوعب مش عشان نلغيه ونديه أجازة ونرجع نشتكي وأنا الصراحه بعذر كتير منهم فعلا والله ماهو لا حياة لمن تنادي فمهما تقول أو تعيد المحصلة صفر .

فياريت بدون اساءه أدب مني يا جماعة رجاء محبه قبل ما تتريق و تهبد .. جرب كده تفهم الأول هتلاقي الدنيا اختلفت خااالص معاك ومعانا برده .. اسمع مني وأدي نفسك فرصة وشغل الجمجمة أو أسكت الله يباركلك عشان جماجمنا إحنا تعبت .

 Tweets by masrelbalad