logo

مش هقول آسفة يا ريس

كتب: نافذة مصر البلد - 2018-06-17 00:09:25

بقلم

 د. مي مجاهد

 

بالرغم من الحال الصعب وغلاء الأسعار والوضع العام اللي بنعيشة في بلدنا حاليا مش هقول برده آسفة يا ريس ... ولا هيجي عليا يوم وأقول ولا يوم من ايامك يا ريس .

مش عشان انا كنت من الناس اللي خرجت عليك ولا عشان بعاند نفسي ولا عشان بحب اطبل للنظام دلوقتي ،

إطلاقا ... بس عشان ببساطة أنت ياريس السبب في كل اللي بيحصلنا ده يا ريس ... أيوة انت السبب وحكومتك ونظامك ومجلسي الشعب والشورى و حزبك الحاكم اللي كان شعاره " مصلحتك أولا ".

 

مش هقول أنا اسفة يا ريس لأني اتحرمت من تعيني في النيابة لصالح فلان ابن المستشار فلان اللي كان عارف مكانه وحاجزه من وهو بيحط طابع الرغبات بتاع التنسيق يا ريس فاكرة بتاع زماااان ده وضاع مني حلم واجتهدت وخدت درجات علمية عشان اتعين زي حاملي الماجستير والدكتوراه بس اخرك شغلتني بعقد مؤقت في الحكومة ب 284.5 ج ، و بقالي 9 سنين حتى مش عارفه اتعين عشان ببساطة الكوسة واللي ليه ضهر هو بس اللي بيتعين .. وأنا مليش غير ربنا ضهر ياريس.

مش هقول أنا آسفة يا ريس لأنك السبب في إني انهارده وأنا لسه مكملة الثلاثين مستقبلي ملوش ملامح انا وجيل الثمنينات كله زي اللي رقصوا على السلم اتحملنا قهر أيامك ولما جينا نفرح مع السيسي بقينا أكبر من سن الشباب عشان عدينا ال 30.

 

أنت يا ريس لو مش عارف ده فأنا بقولك انت السبب في كل اللي وصلناله لحد انهاردة :

- سبب إنتشار فيروس سي وسرطان الاطفال وتردي حال المنظومة الصحية في مصر كلها.

- سبب إنتشار العشوائيات بكل مرضها وفسادها و شذوذها .

- سبب إنتشار الفساد اللي بينهش في البلد ليل نهار وتهميش دور المحليات وتحويلها لصبي ودراع ليهم في المحافظات .

- سبب في ضياع أبسط المبادئ القانونية في الفصل بين السلطات لأنك سمحت لحكومتك الهليبة تبقى كلها أعضاء في مجلس الشعب وبتراقب على نفسها ده غير تفصيل القوانين وتأييف الدستور على مقاس معاليك أنت وابنك البكري .

- سبب إنتشار الفقر من صفقات حكومتك الفاسدة و التلاعب بقوت الغلابة واحتكار السلع الغذائية و الإستراتيجية زي الحديد والاسمنت والسكر والرز رغم قوانين منع الإحتكار غير خصخصة شركات القطاع العام والمصانع لصالحك .

- سبب إنتشار الجهل والأمية وتدهور منظومة التعليم والمدارس لحد ما بيطلع الطلاب مش عارفين يقروا ولا يكتبوا بمعنى الكلمة والمدارس بقى بيتشرب فيها مخدرات .

- سبب في ضياع الحياة السياسية وتهميش دور الأحزاب وقتل أي فكر جديد لصالح حزبك اللي كان كله فساد في فساد .

- سبب في وصول الفكر الإخواني لكل الجامعات و النقابات وسيطرتها على فكر الشباب مقابل البعد عن الحكم والسلطة .

- سبب في إنتشار الوساطة والمحسوبية والكوسة و التعين بكارت الباشا فلان وعلان وبقي اللي تعب و سهر وخد درجة علمية مركون على الرف بيتحسر جمب شهداته وانتشرت البطاله وهج الشباب وماتوا في مراكب في عرض البحر.

- سبب إهمال الصعيد بكل محافظاته والاهتمام بس بالعاصمة وشرم الشيخ علي حساب التنمية هناك عشان مزاج معاليك والحرامية اللي حواليك.

- سبب تدهور منظومة النقل العام كلها وهيئة السكة الحديد وضياعها والحوادث ودم الغلابة شاهد على فلوس الشعب اللي كانتت بتتسرق عيني عينك .

- سبب في كره الناس للداخلية و إنتشار سيطرة أمناء الشرطة على مصايرهم وكمان بقوا المتحكمين في البلطجية وسواقين الميكروباصات .

 

دي أمثلة بس لكثير من اللي مر بيه المواطن المصري. اللي بسببك مات في طوابير العيش و الأنابيب والمستشفيات الحكومية وقطر الصعيد و عبارة السلام ..... مش هقول أنا اسفة يا ريس ولا هلغي دماغي عشان انت سبب كل اللي احنا فيه ،

وبغبائك و فساد نظامك إحبطت جيل كامل عاش وحلم وكبر ودرس واتعلم واجتهد ودلوقتي منبوذ عشان للأسف عدى التلاتين.

 Tweets by masrelbalad