logo

حابس...حابس.....

كتب: نافذة مصر البلد - 2018-01-13 10:08:50

بقلم

سامية عابدين

 

ليه فكرة السحر والاعمال السفلية والعين الحسد مسيطرة بشكل قوي على المجتمع المصري؟؟...طبعا كل ده موجود والقران الكريم حذرنا منه ودلنا على الوقاية والعلاج ..بس مش كدة يعني؟ مش كل واحد يطلع ليه فسفوسة في ام وشه يقول انا محسود...مش  كل واحدة مستفزة  مطلعة عين جوزها يوم ما يخبطها كف تقول يا لهوي..يامرك يا نعمة مين اللي عاملك عمل؟ولا واحد مفتري ماحدش علمه يعني ايه زواج وعشرة يوم ما مراته تنفد بجلدها من عيشته السودة يقول شفتوا اهي الأعمال مرمية عند البيت... مش كل  أما نلاقي حبة تراب اسود مرميين صدفة على عتبة بيتنا نقول حد عاملنا عمل....مش كل فنان ما يتوفقش في دوره يقول زميلي عملي عمل...ولا فريق كوووورة...حتى بتوع الكورة بيقولك خسرنا بسبب اعمال سفليه...ولا تصطبح الصبح على بوست واحدة فاضية ولا واحد فاضي كاتبه...."الناس مركزة في حياتي اكتر مني لما عنيهم دمرتني " ياعم مركزة في حياتك بصفة حضرة سيادة جنابك مين ؟افهم يعني؟

فكرة الاستناد في كل امور حياتنا على الهلوسة دي زيادة عن اللزوم مسيره هيجننا ويسحبنا الف سنة ورا....دا حتى الدراما مركزة بشكل مكثف على الأعمال والتعاويذ والسحرة لما ربوا عند الشعب الخفيف...ولا برامج الفضائيات فحدث ولا حرج..خبير طالع وفلك واضحك يا واد ع الناس بكلمتين يطمنوا قلبهم على مستقبلهم المنيل بنيلة . ويطلع واحد يقول مصطلحات قعد كدة بالليل مع نفسه الفها من دماغه الخربانة...اكاد اجزم ان الناس دي ماجورة ومدفوع ليها من جهات معادية لمصر..مصلحتهم تدمير عقولنا وقيمنا وايماننا وثقافتنا......

ومن الكوارث اللي بتحصل اليومين دول واللي انتشرت في الصعيد بشكل مخيف..فكرة التنقيب على اثار تحت البيوت وييجي الدجال ينصح صاحب البيت بقتل حد مقرب ليه...بنته او بنت اخوه قال ايه علشان الجن يرضى عنه ويدله على مكان الاثار....

احنا كدة بنجر المجتمع للعصر الحجري ايام الانسان الأول الي كان عايش في الغابات...معقولة في زمن التكنولوجيا وصعود الفضاء وتصنيع القنبلة النووية لسة عقليتنا كدة؟

لا اسمحولي احنا كدة نستاهل ضرب النار في مركز التفكير في مخنا لأنه اتكهن وبقة خردة....يمكن نفوق..

نصيحة. يوم ما تتعب اسجد سجدتين وادعي وسمع الارض بكاءك من الخشوع..قول يارب من قلبك اصلح احوالي وابعد عني ولاد الحرام..ارفع ايدك للسما وادعي ان ربنا يحفظك ويحفظ اولادك وحبايبك...وكن على ثقة دائما ان لو اجتمعت الامة على ان يضروك بشئ لن يضروك الا بشئ قد كتبه الله عليك....ماحدش في ايده النفع والضر غير رب العباد.. فقط اليقين ....كن ثابت على الايمان بان ربك حاميك...

 Tweets by masrelbalad