logo

إسترجل

كتب: نافذة مصر البلد - 2018-09-28 17:19:32

بقلم

د.مى مجاهد

 

هو في بنت سهل تفرح دي بني ادمة نكدية كل ما أحاول أفرحها تدب معايا خناقة وتلوي بوزها زيادة يا ست روحي ال أسعد واحدة ال

 

طبعا ده كان الرد علي السؤال بتاعنا ازاي تخليها اسعد واحده في الدنيا ؟ لدرجه تحسسك ان البنت دي مخلوق معقد ومليان كلاكيع

 

والحقيقه عكس اللي شايفنها علي رأي الست اليسا ، لان البنوتة تمام زي الوردة كل ما ترويها بحبك وحنانك هتفتح ورقاتها ويفوح عبيرها يملي دنيتك سعادة وفرحة بس أهم حاجه وأول واخر حاجه تسترجل.

 

أيوة تسترجل .. أصل بكل بساطة كلمة الحب تساوي وعد لو مكنتش قده متوعدش وتكسر قلبها وتجبلها اكتئاب يا بن الحلال الله لا يسيئك ... بتحبها يعني هتتعب وهتعافر عشانها لو مش هتعرف أو عايز تقضيها لا يكلف الله نفسا الا وسعها الله يكرمك أبعد عنها ودعها وشأنها .. البنت أهم من الحب عندها الأمان فاهمني الأمااان .. أنها تنام بليل وهي مطمنه أنها هتصحي وأنت في حياتها لسه بتحبها وجمبها و قد كلمتك مش هتصحي على البلوك الأليم أو كلمة معلش.

 

فلو مكنتش أمانها و حمايتها متصرحهاش ، لو مكنتش تخبيها ورا ضهرك من كل حاجه متقولهاش ، متكسرهاش بعد ماعلقتها بيك ، العشم ممكن يموتها فارجوك استرجل وسيبها بقلب من جروح.

 

ولما تسترجل معاها وتحبها بجد ... هغششك شوية حجات لو عملتها هتعيش ملك زمانك في دنيتها الصغنتوته.

 

- أول وأخر حاجه وفي الوسط إنك تقولها بحبك كل شويه البنات مش بتعترف بموضوع الحب أفعال لا أقوال ده شعار الفريق شفيق وخسر الإنتخابات لما رفعه.

 

- خليك دايما ف ضهرها ومتتخلاش عنها ابداً حتي لو طلباتها أنت شايفها تافهة وممكن تعملها وحدها هي بتحب تحس أنها بتعتمد عليك حتي لو في إختيار لون الطرحة خليك راجلها بجد.

 

- عودها تجري عليك و تحكيلك مشاكلها و تفاصيل يومها من غير كسوف واسمعها وتفاعل معاها و متتخلاش عنها في لحظات زعلها حتي لو كانت مشكلتها ان المونيكير باز .

 

- قولها بحبك

 

- صاحبها وشاركها كل اهتماماتها واحلامها حتي لو كانت نفسها تركب موتوسيكل الصيح بدري علي كورنيش اسكندرية فعز التلج مالهاش غيرك علفكرة.

 

- غير عليها بحنية بس متشكش فيها .. بقولك أهو بلاش جو متلبسيش ومتخرجيش ومتعمليش و متكلميش، البنت بتفرح لما بتسمعهم منك جداُ بس هي مش طارشة ممكن تقول بصوت واطي الراجل الذكي اللي يخلي حبيبته تعمل اللي هو عايزه من غير ما يطلب بلاش تديها أوامر .. أنت بتحبها مش شاريها من سوق الجواري.

 

- قولها بحبببببببك.

 

- وأنت في شغلك ابعتلها رساله قولها وحشتيني اووي حتي لو أنا مشغول عنك برده في بالي ابعتها ولو علي الفيس خليها رقم واحد ف حياتك المسج دي عندها بكل كنوز الدنيا متنفضش وترحع تقولها بعمل تقارير ولا هتصدقك.

 

- عيش معاها طفولتها وبراءتها وعفويتها حتي لو هبلها ساعات كتير البنت بتختلق مشاكل عشان تصالحها وتتحايل عليها ، صالحها حتي لو هي اللي غلطانة واوعي تنسي تتصور معاها سيلفي ببوز البطة .

 

- قولها بحبك جدا.

 

- لو ضحكتها حلوه عرفها ودايما قولها كده لو فستانها يجنن فرحها هي لابساه عشانك أنت ، و متقارنهاش بحد اوعي تعمل كده هيكون يوم مش فايت .. علي طول احتويها وحسسها انها في عيونك اجمل بنت في الدنيا هي مستنيه الكلمه دي منك علي فكره مقعدتش تلبس ساعه عشان اول ماتقابلها تقولها بقرف اتاخرتي ليه.

 

- دايما طبطب علي كتفها بابوه وحنية ولو لقيتها مخنوقة خدها فحضنك وضمها لقلبك وهي ماشيه جنبك أحضن ايديها بين كفوف إيديك كل ده بيوصلها إنك بتحبها بس طبعا متنساش تقول بحبك واخد بالك.

 

- قولها بحبك مووووت .

 

- البنت طبيعي بتخاف وأنت طبيعي تطمنها احميها من كل الناس والدنيا وإن حكمت احميها من نفسك من حتى رغباتك لحد ما تكون مراتك قدام العالم ،متعليش صوتك عليها مهما حصل متخوفهاش منك طمنها كأنك باباها هي فعلا طفله صغننة بين اديك.

 

- متزهقش منها لما تكلمك علشان تحكيلك علي الشعرة البيضه اللي لاقتها فجاه وهي بتسرح و مكتئبة عشانها الموضوع ده موضوع حياه او موت بالنسبالها متستهونش بده ابدا وتعامل معاها بكل جدية ولو قدرت تسيب شغلم وتقابلها بشكولاته و ورده ياريت اعتبرها بنتك يا اخي.

 

- قولها بحبك أوي.

 

- لو لاقيتها متغيرة معاك أتأكد أن في حاجه ضايقتها منك صالحها الأول وبعدين أبقى أعرف على مهلك الدنيا مش هطير ولو قالت لك مفيش حاجه و سيبتها يبقى اتحمل بقه يا كابتن احنا مبنعترفش بموضوع سيبتك تهدي وبعدين نتكلم اومال حضرتك دورك إيه إن شالله.

 

- لو بتقولها تعالي نخرج و قالتلك لاه يبقي قصدها موافقة طبعا ولو اتحايلت عليها وقالتلك انسي يبقي معناها هتعدي عليا امتي .. ولو اتنرفزت و قالتلك قولت لاه يعني لاه يبقي معناها اقفل الفون عشان الحق البس دلوقتي .... علله بقه انت تصدق انها مش عايزة وتكبر دماغك وهي بتلبس هتسيبك لحد الوقت ما يعدي وهتعيش اسود اسبوع فحياتك .

- قولها بحبك والله العظيم.

 

- كلمها بالليل قبل ما تنام واحكيلها عن يومك وازاي تعبت في بعدها عنك ومتخبيش عنها حاجه حتي لو هتزعلها لما تعرفها منك غير لما تعرفها من غيرك يا استاذ ولو سالتها عملتي ايه انهاردة يبقي كتر ألف خيرك ولازم تختم كلامك بخلي بالك من نفسك وهتوحشيني والا هتلاقي تاني يوم الوش الخشب.

 

- متنساش الاحداث المهمه اللي عشتوها سوا اول يوم شفتوا بعض اول يوم قولتلها بحبك اول يوم مسكت ايدها اول يوم اتجننتوا سوا واعملها مفاجأه فيه وتبقي هايل لو عملتلها مفاجاه من من غير مناسبه .

 

- قولها بحبك اقسم بالله.

 

بلاش تعاملها بقسوه ابدا او تعنفها قدام الناس واوعي تقلب وشك قدامها حتي لو غلطانة البنت كائن رقيق كده محتاج معامله خاصه اوي ومتسبهاش تنام زعلانه منك ابدا وطبعا قولها بحبك .

 

- خليك بطلها واتعب واعرق علشانها وبينلها اد إيه سبت الدنيا كلها وجتلها لما حسيت صوتها متغير في الفون ، وأنها لما اتصلت تحكيلك من اللي عاكسها في المترو كنت هتدغدغ الدنيا وتكسرها علي دماغه لولا هي حلفت بس ، أحلى حاجه التعب عشانها هتلاقيه في الحب راحه.

 

كفايه عليك تغشيش كده وزي ما قولتلك خليك راجل ، قد كلمتك وقد وعدك وقد حبك ... الحب بيتولد ويعيش في النور قدام الكون انا الضلمة و السر والخفا بتخنقه وتموته ،متعلقهاش بيك وتسيبها لأي سبب وتقول أصل الحب والظروف مش بتاعتي وتعلق فشلك إنك تحافظ عليها وتحتويها علي شماعة الظروف والنصيب لأن اللي عايز بيوصل .

 

لو عملت ده صدقني هتلاقي قدامك شويكار في فيلم أجازة غرام وهتغنيك عن كل الدنيا بس استرجل و أوعى تنسي تقولها بحبك.

 


  توجت أمينة محمد ملكه جمال الموضه… اقرأ المزيد

أمينة محمد ملكه لجمال الموضه

استضافت اليوم الادارة المركزية للبرامج الثقافية و… اقرأ المزيد

ملكة جمال مصر 2017 ضيفة ملتقى " لنعبر جسرا "

 Tweets by masrelbalad