logo

ما بين الأصل و الصورة

كتب: نافذة مصر البلد - 2018-01-05 21:19:16

الشاعرة _هناء عوض

 

ما بين الأصل و الصورة ... كتير عايشين ...

و بالكلمة اللي مغروسة ... بقالها سنين

تزن ... تئن تتألم و موجوعة ...

و تحجب دموعها رموش العين !!!

 

ما بين الصدق و الكذبة كتير تايهين ...

تصدق يوم و تتعشم ، لمين و لفين

وعود باهتة ... لكن تبان مشروعة ...

ما تستغربش ده طبع البني آدمين !!!

 

ما بين الصدمة و توابعها كتير باقيين ...

على العشرة و شارينها ...

و على اللي منها و عارفينها

و ع الشكوى اللي مسموعة

سنين ساكتين ، سنين صابرين !!!

 

ما بين الدمعة و الضحكة كتير شاردين ...

لا دي معناها فرحتها و لا التانية لقلب حزين

لكن بنخبي و نداري ... مين بايع و مين شاري

و تبقى الدنيا شايفينها و ممنوعة

يعيشها قلوب المخلصين !!!

 

ما بين النبضة و التانية كتير حاسين ...

بحروف اسامي ناس غيرهم مكملين

محفورة جوة قلوب متملكين ...

يفوت العمر و يعدي... شوية بسرعة شوية يهدي  ...

و هي هي الاسامي منقوشة بدون عناويين !!!

و لا فارقة ... علشااان ....

ما بين الأصل و الصورة ... كتير عايشين !!!


 Tweets by masrelbalad