logo

خليها اسعد بنوتة في الدنيا

كتب: نافذة مصر البلد - 2017-07-24 15:41:29

بقلم

مى مجاهد

 

هو في بنت سهل تفرح دي بني ادمة نكدية كل ما احاول افرحها تدب معايا خناقة وتلوي بوزها زيادة يا ست روحي ال اسعد واحده

طبعا ده كان الرد علي السؤال بتاعنا ازاي تخليها اسعد واحده في الدنيا ؟  لدرجه تحسسك ان البنت دي مخلوق معقد ومليان كلاكيع

والحقيقه عكس اللي شايفنها علي راي الست اليسا ، لان البنوتة تمام زي الوردة كل ما ترويها بحبك وحنانك هتفتح ورقاتها ويفوح عبيرها يملي دنيتك سعادة وفرحة وتعالي هساعدك  واغششك شوية حجات لو عملتها هتعيش ملك في دنيتها

            أول وأخر حاجه وفي الوسط انك تقولها بحبك كل شويه البنات مش بتعترف بموضوع الحب افعال لا أقوال ده شعار الفريق شفيق وخسر الانتخابات لما رفعه.

            خليك دايما ف ضهرها ومتتخلاش عنها ابداً حتي لو طلباتها انت شايفها تافهة وممكن تعملها وحدها هي بتحب تحس انها بتعتمد عليك حتي لو فاختيار لون الطرحة خليك راجلها بجد.

            عودها تجري عليك و تحكيلك مشاكلها وتفاصيل يومها من غير كسوف واسمعها وتفاعل معاها و متتخلاش عنها في لحظات زعلها حتي لو كانت مشكلتها ان المونيكير باز .

            صاحبها وشاركها كل اهتماماتها واحلامها حتي لو كانت نفسها تركب موتوسيكل الصيح بدري علي كورنيش اسكندرية فعز التلج مالهاش غيرك علفكرة.

            قولها بحبك .

            غير عليها بحنية بس متشكش فيها .. بقولك اهو بلاش جو متلبسيش ومتخرجيش ومتعمليش ومتكلميش البنت بتفرح لما بتسمعهم منك جداُ بس هي مش طارشة ممكن تقول بصوت واطي الراجل الذكي اللي يخلي حبيبته تعمل اللي هو عايزه من غير ما يطلب بلاش تديها أوامر .. انت بتحبها مش شاريها من سوق الجواري.

             قولها بحبك موووت.

            وانت في شغلك ابعتلها رساله قولها وحشتيني اووي حتي لو انا مشغول عنك برده فبالي ابعتها ولو علي الفيس خليها رقم واحد ف حياتك المسج دي عندها بكل كنوز الدنيا بجد متنفضش وترحع تقولها بعمل تقارير ولا هتصدقك.

            عيش معاها طفولتها وبراءتها وعفويتها حتي لو هبلها ساعات كتير البنت بتختلق مشاكل عشان تصالحها وتتحايل عليها صالحها حتي لو هي اللي غلطانة واوعي تنسي تتصور معاها سيلفي ببوز البطة .

            لو ضحكتها حلوه عرفها ودايما قولها كده لو فستانها يجنن فرحها هي لابساه عشانك انت ومتقارنهاش بحد اوعي تعمل كده هيكون يوم مش فايت .. علي طول احتويها وحسسها انها في عيونك اجمل بنت في الدنيا هي مستنيه الكلمه دي منك علي فكره مقعدتش تلبس ساعه عشان اول ماتقابلها تقولها بقرف اتاخرتي ليه.

            دايما طبطب علي كتفها بابوه وحنية ولو لقيتها مخنوقة خدها فحضنك وضمها لقلبك وهي ماشيه جنبك احضن ايديها بايديك كل ده بيوصلها انك بتحبها بس طبعا متنساش تقول بحبك واخد بالك.

            .البنت طبيعي بتخاف وانت طبيعي تطمنها احميها من كل الناس والدنيا وان حكمت احميها من نفسك متعليش صوتك عليها مهما حصل متخوفهاش منك طمنها كأنك باباها هي فعلا طفله صغننة بين اديك.

            قولها بحبك أوي.

            متزهقش منها لما تكلمك علشان تحكيلك علي الشعرة البيضه اللي لاقتها فجاه وهي بتسرح و مكتئبة عشانها الموضوع ده موضوع حياه او موت بالنسبالها متستهونش بده ابدا وتعامل معاها بكل جدية ولو قدرت تسيب شغلم وتقابلها بشكولاته و ورده ياريت اعتبرها بنتك يا اخي.

            لو بتقولها تعالي نخرج و قالتلك لاه يبقي قصدها موافقة طبعا ولو اتحايلت عليها وقالتلك انسي يبقي معناها هتعدي عليا امتي .. ولو اتنرفزت و قالتلك قولت لاه يعني لاه يبقي معناها اقفل الفون عشان الحق البس دلوقتي .... علله بقه انت تصدق انها مش عايزة وتكبر دماغك وهي بتلبس هتسيبك لحد الوقت ما يعدي وهتعيش اسود اسبوع فحياتك .

            قولها بحبك والله العظيم.

            كلمها بالليل قبل ما تنام واحكيلها عن يومك وازاي تعبت في بعدها عنك ومتخبيش عنها حاجه حتي لو هتزعلها لما تعرفها منك غير لما تعرفها من غيرك يا استاذ ولو سالتها عملتي ايه انهاردة يبقي كتر ألف خيرك ولازم تختم كلامك بخلي بالك من نفسك وهتوحشيني والا هتلاقي تاني يوم الوش الخشب.

            متنساش الاحداث المهمه اللي عشتوها سوا اول يوم شفتوا بعض اول يوم قولتلها بحبك اول يوم مسكت ايدها اول يوم اتجننتوا سوا واعملها مفاجأه فيه وتبقي هايل لو عملتلها مفاجاه من من غير مناسبه .

            قولها بحبك اقسم بالله.

            بلاش تعاملها بقسوه ابدا او تعنفها قدام الناس واوعي تقلب وشك قدامها حتي لو غلطانة البنت كائن رقيق كده محتاج معامله خاصه اوي ومتسبهاش تنام زعلانه منك ابدا وطبعا قولها بحبك .

            خليك بطلها واتعب واعرق علشانها وبينلها اد ايه سبت الدنيا كلها وجتلها لما حسيت صوتها متغير في الفون وانها لما اتصلت تحكيلك من اللي عاكسها في المترو كنت هتدغدغ الدنيا وتكسرها علي دماغه لولا هي حلفت احلي حاجه التعب عشانها هتلاقيه في الحب راحه.

            كفايه عليك كده بس لو عملت ده صدقني هتلاقي قدامك شويكار في فيلم  اجازة غرام وهتغنيك عن كل الدنيا بس متنشغلش عنها ابدآ .. ومتبعدش عنها ابدآ واوعي تنسي تقولها بحبك.


 Tweets by masrelbalad